Jólalag from hell...

Mér var allri lokið í morgun þegar ég í sakleysi mínu kveikti á útvarpinu....og klukkan var rétt um 9 leytið....þegar það sem braust inn um eyru mín var "Run to the hills" með Iron Maiden og varð mér svo mikið um að ég hellti of mikilli mjólk í ilmandi heitt kaffið. Sko, í fyrsta lagi var þetta ekki Iron Maiden, heldur var búið að íslenska það og hefði þá ekki samkvæmt öllu textinn átt að vera "hlaupum að hólunum"??? En, nei,nei,nei,nei...heldur var textinn "Gleðileg jól" þar sem "run to the hills" var hér í den.......Hvað er að??? Hvaða fæðingarfávita dettur í hug að taka svona óhugnarlegt og óbarnvænt lag og reyna að slá því upp í eitthvað jólahringl ??? Á ekki börnum að hlakka til jólanna?? Eða er Eddie orðinn einn af jólasveinunum?? Ég slökkti á útvarpinu pent og ákvað að setja valin jólalög Gerðar G Bjarklindar á.
Ég gat ekki betur séð og heyrt en að dræm þáttaka yrði á þorrablótinu góða í febrúar......þannig að ég sit bara ein heima og blóta í staðinn......ég get sossum alveg blótað karlmönnum yfir fertugt þ.e.a.s ef ég verð ekki búin að stíga á stokk og lofa því að hætta að halda að þeir séu fávitar.
Ég held að Móðir jörð verði ekki eins sátt ef engin mætir, hún er búin að skrá niður efnisfirlit fyrir hvern og einn frá komu til brottfarar....
Á 6 litla kettlinga sem eru orðnir 5 vikna og farnir að álpast út um allt, ég þarf að kenna þeim að drekka eitthvað annað en mömmu sína, sem étur á við hross, og svo pissa þeir út um allt gestaherbergi og ég ræð ekki við neitt......ég hef ekki tíma í þetta með mini-kokksa og allt !! Þeir eru rosakrútt og vantar heimili.....HJÁLP!!! .......Grumpa, þeir eru samt ekki til átu handa löngu vitleysunni....

Lúsíupartý en engin Lúsía...

Búin að vera með baunir í hausnum í dag, engan verk eða ógleði né neitt sem tengist þynnku almennt, en hausinn er svona cirka 5 mínútum of seinn í gang hjá mér í dag......Það var nefnilega slett úr klaufunum í gærkvöldi í hinu árlega Lúsíudjammi !! Ég ætlaði á trúnó og búin að safna alveg fullt af efni en svo gleymdist það víst. Ég ætlaði líka að komast á sjéns við einhvern stæltan olíuborinn og forríkan karlmann á fertugsaldri með dökkt hár og c.a 85-90 kíló en svo gerðist ekkert......eina sem gerðist var að fyrrverandi hringdi kl. 03.25 þegar ég var lögst til hvílu til að fara á trúnó og segja mér að hann væri búinn að stunda fjallgöngur í 1 ár. En þetta var gott djamm þó Grumpu hafi verið sárt saknað, hún stoppaði ekki nógu lengi með oss sem er kannski ástæðan fyrir því að ég komst ekki á trúnó!! Zorglúbb fór 2 sinnum heim, af einhverjum ástæðum hefur hann ruglast á miðri leið heim og haldið að hann væri á leiðinni Á djammið og snúið við. Forski og Frúin fóru að þrasa en sættust með "mér hefur alltaf þótt svo vænt um þig" músí músí mín og við Monopoly vorum innikróaðar í sætunum og neyddumst til að fylgjast með. Ég brunaði svo heim með baunahaus og perubragð í munni í morgunn og knúsaði mini-kokksann minn.....Hver verður Lúsían næst?? Einhver sem mætir takk.

Jólamánuður genginn í garð...

Jæja, þá er jólamánuðurinn kominn og ég er búin að setja upp 2 jólaseríur, 4 aðventuljós og greinar með ljósum á í stofugluggann.....þetta fór ekki allt í stofugluggann, heldur bara greinarnar, hitt fór út um allt hús. Svo er ég farin að skoða kjöt í búðunum og bera saman verð, plana hvar best er að setja jólatréð án þess að mini-kokksi og 6 litlir kettlingar rústi því á 5 sekúndum !! Konfektgerðar-tækið sem ég gaf múttu í jólagjöf í fyrra verður nú dregið fram í fyrsta sinn og dustað af því rykið, jólalög eru orðin vinsælt undirspil á heimilinu og ég er búin að taka myndir af mini-kokksa með jólasveinahúfu til að setja í jólakort.
Ekki er ráð nema í tíma sé tekið.....sagði einhver sem var vel skipulagður.
Ég er ennþá á móti karlmönnum yfir 40 og mun það kannski verða nýársheitið mitt á gamlaárskvöldi......verður að vísu að vera þá eftir nokkur kampavínsglös, að hætta að halda að þeir séu fífl eftir fertugt.
Ég er farin að telja dagana í Lúsíudjammið og í ár verður það áfengur perucíder sem ég kem með til að geta farið á trúnó og gert mig að fífli. Þar sem ég er orðin góð húsmóðir í dag og eyði tíma mínum með mini-kokksa eins mikið og ég geri þá er eins gott að haga sér eins og fáviti þegar maður leyfir sér að fara í rokkælu-múnderinguna svona for once. Ég mæli ekki með að Frúin fari í einhverju óðagoti að búa til bar ef ekki eru peningarnir, nema hún ætli að bjóða uppá rúðupiss, skurepulver í kóki með klaka eða mýkingarefni í sprite....við ætlum að lifa af kvöldið Frú mín góð. Stóra spurningin er bara hvar ég á að sofa, vona að hún eigi dýnu handa mér og sæng og ekki of harðan kodda...

Fimmtudagur til fúkyrða...

Þessir helvítis karlmenn!!! Þeir eru allir eins!!!...þ.e.a.s um leið og þeir verða 40 ára þá brenglast eitthvað í hausgarminum og þeir verða eins og refir í hænsnabúi. Alltaf þegar maður slakar á, heldur að það sé óhætt að halla sér aftur í sófanum, með kakóbolla í hönd og í uppáhalds inniskónum, með teppi yfir sér þá slær niður bara einhverri crappy eldingu frá einhverjum doðhausnum útí bæ!! Ég held að héðan í frá fari ég að gefa þeim gaum sem virðast við fyrstu sýn ekkert spes, því það eru alltaf þeir sem kunna að gefa manni gott nudd á meðan legið er í sófanum, með kakóbolla í hönd, í uppáhalds inniskónum og með teppi yfir sér...Þannig að hér með auglýsi ég eftir manni sem er ekkert spes !!!
Mini-kokksi hefur það gott, er orðinn 67 cm og vegur 7 og hálft kíló. Ég hélt mömmumorgunn í gær og við vorum 6 mömmur og jafnmörg kríli, öll á sama aldri. Mini-kokksa fannst svolítið að sér vegið fyrst þegar teppið hans varð allt í einu morandi í krílum, en gleymdi sér fljótlega í þeirri skemmtan að reyna rúlla sér yfir hvern sem fyrir var. Hann fór að skæla í 4 sekúndur þegar ein stelpan klóraði í hausinn hans því hann blasti þarna nauðaskollóttur við!!!
Þegar mini-kokksi verður 40 ára þá ætla ég að minna hann á þetta. " Don't do the crime if you can't do the time".
Er annars farin að hlakka til jólanna......en þið??

Þessir karlmenn!!!

Einu sinni sat ég á spjalli við mann og við töluðum um allt mögulegt og ómögulegt, og meðal annars um menn og konur. Þá mér til mikillar furðu stoppaði hann mig og spurði af hverju ég notaði alltaf orðið "þið" þegar ég var að tala um menn. Eftir þessa litlu ábendingu hef ég pælt svolítið í þessu. Ég ákvað að hætta að einblína á karlmenn í sinni heildarmynd og sjá frekar að auðvitað er hver og einn einstaklingur sérstakur og að enginn er eins. Sjálfri þætti mér mikið til þess manns koma sem notaði ekki orðið "þessar helvítis kellingar eru allar eins. " En því miður þá freistast bæði kynin til þess að baktala hvort annað svo mikið að þetta er orðið viðurkennd samtöl vina og félaga. Heimurinn hefur uppá allskonar fífl að bjóða, og það hljómar hæst í tómum tunnum ekki satt?? En það eru þessi fífl sem skyggja á hina sem eru alveg jafnmargir og eru bara hreint engin fífl, heldur ótrúlega elskuverðir góðir menn. Vandamálið er hinsvegar að oftast eru þeir þegar fráteknir og alls ekki gangandi um lausir. Ef heppnin er með manni má finna einn og einn á rangli, en það er bara álíka mögulegt og að finna nál í heystakki. Ég hef enga lausn á þessu vandamáli nema kannski að gerast nunna í einhverju klaustri í Ítalíu.....verst bara að ég hef væntanlega syndgað of mikið til að á inngöngu....ætli ég brynni ekki upp til ösku!!

Jæja, þá er veturinn kominn og ég næstum búin að fjúka út í rassgat þegar ég vogaði mér út fyrir hússins dyr nú um helgina !! Maður beið eftir því að sjá húsin með kirkju og öllu saman fljóta burt út í haf og yfir á Þorlákshöfn þegar mesti vindhraðinn var.
Ég er farin að telja dagana til Lúsíukvöldsins með rokkælunum, því þó ég verði ósofin og með barnaælu á barmi þá mæti ég nú með sossum einn, tvo bjóra undir hendi. Kannski ég komi með eina jafnvel tvær sögur af mini-kokksa. Get líka slegið upp slidesjóvi fyrir þá sem eru spenntir.
Mini-kokksi byrjaði að velta sér af baki á maga fyrir örfáum dögum og hefur ekki hætt síðan !! Allt í einu er hann orðinn stór og hættur að vera infant sem er bara kyrr þar sem ég læt hann niður. Þá er bara að breiða úr stóru teppi í stofunni og leyfa honum að rúlla um allt.
Ég fór í Ikea í síðustu viku og keypti allt herbergið hans, málaði fyrst auðvitað og stenslaði meira að segja hvíta hesta á vegginn. Þetta var svakalega gaman og ég fékk jafnvel smá aðstoð hjá Forska sem tók á móti mér við inngang Ikea með blómum og blöðrum. Það eina sem mig vantar er rimlarúm, því fröken Líkjör ætlaði að lána mér sitt........en enn sem komið er hef ég bara í höndunum rimlana, engar skrúfur og enga dýnu....
Veit einhver um rúm handa honum ??.....

Laugardagur

Ég hef verið að horfa á hausinn á mini-kokksa og það er sossum ekki mikið að gerast í hárvexti hjá þeim stutta, en ég held að hann verði ekki rauðhærður, eins og sumir hafa spáð fyrir um. Ég held að það sé barasta ágætt, við rauðhausarnir erum alltaf undir í könnunum. Það er að vísu munur á því hvort um kven eða karlmann sé að ræða. En greyið við rauðhærðu konurnar......það er alltaf litið á okkur sem eitthvað öðruvísi en ljóskurnar og brúnetturnar bara af því að hárið á okkur er rautt !! Sögur segja að við séum yfirhöfuð reiðari og æstari og skapverri en annað kvenfólk, og rautt hár hefur verið notað óspart sem tákn um eitthvað neikvætt. Lína langsokkur var rauðhærð því hún bjó ein í litlu hreysi og gekk í druslum, með svo skítugt hár að það bókstaflega stóð út!! Rauðhóla-Rannsý, ljót brussuleg, rauðhærð. Mía litla í Múminálfunum er alltaf reið í framan því hún er síkvartandi og yfirhöfuð í vondu skapi, og auðvitað er hún látin vera rauðhærð. Ef ég man rétt var Salka Valka Rauðhærð og hún bjó í ástlausri vosbúð. Engin kona sigrar í fegurðarsamkeppnum, allar ljótar konur í auglýsingum eru rauðhærðar, allir nördar í kvikmyndum eru rauðhærðir, engin hjartgóð kona er rauðhærð í söngvatextum, allar brussur í bókum eru rauðhærðar. Ég man ekki eftir neinni rauðhærðri prinsessu úr Disney.....nema hafmeyjan, en hún er ekki prinsessa. Ég legg til að rauðhært fólk stofni lítið samfélag og lifi í sátt og samlyndi, og þá verður engin útundan.